డ్రగ్ డాన్ కమింగ పాతబస్తీ అల్లుడే

డ్రగ్స్ దందాలో పట్టుబడ్డ ప్రధాని నిందుతుల్లో కెల్విన్, జిశాన్‌తోపాటు నెదర్లాండ్‌కు చెందిన మైక్ కమింగ కూడా ఒకరు. తెలంగాణ పోలీసులకు పట్టుబడ్డ డ్రగ్ మాఫియా డాన్ మైక్ కమింగ హైదరాబాద్ అల్లుడని విచారణలో తేలింది. పాతబస్తీకి చెందిన యువతిని వివాహం చేసుకుని, నానక్‌రామ్ గూడలో కాపురం పెట్టినట్లు సిట్ అధికారులు గుర్తించారు. రిమాండ్ ఖైదీగా ఉన్న మైక్ కమింగను సిట్ అధికారులు మూడు రోజుల కస్టడీలోకి తీసుకున్నారు. కమింగను విచారించిన పోలీసులకు కీలక సమాచారం లభించింది. ఏడేళ్లుగా అతడు హైదరాబాదులో మత్తు పదార్థాలను విక్రయిస్తున్నట్టు అధికారులు గుర్తించారు. 

పాతబస్తీకి చెందిన యువతిని వివాహం చేసుకున్న కమింగ్‌కు మూడేళ్ల కుమారుడు కూడా ఉన్నాడు. నెదర్లాండ్ నుంచి ఖరీదైన డీఎంటీ డ్రగ్ (డీమీథైల్ ట్రైప్టమైన్) ను దిగుమతి చేసుకుని కాలేజీ విద్యార్థులు, సాఫ్ట్‌‌వేర్ ఉద్యోగులకు అమ్మినట్లు సిట్ అధికారులు తెలుసుకున్నారు. డ్రగ్స్ అమ్మకాల ద్వారా వచ్చిన సంపాదనతో విలాసవంతమైన జీవితాన్ని గడుపుతూ జల్సాలు చేసేవాడని విచారణలో తెలుసుకున్నారు. కెల్విన్, జిశాన్‌లతో కమింగ్‌కు సంబంధాలు ఉన్నాయా లేక ఎవరి వ్యాపారం వారిదేనా అనే కోణంలో అధికారులు విచారిస్తున్నారు.

అలాగే టాలీవుడ్ ప్రముఖులకు కూడా డ్రగ్స్ సరఫరా చేశాడా? చేస్తే ఎవరెవరితో ఇతడికి సంబంధాలు ఉన్నాయనే ఆరా తీస్తున్నారు. మరోవైపు డ్రగ్స్ కేసులో నోటీసులు అందుకున్న 12 మంది సినీ ప్రముఖుల విచారణ కూడా పూర్తయింది. విచారణకు హజరైన వారి నుంచి సేకరించిన సమాచారంతో నివేదికను తయారు చేసిన సిట్ దీని ఆధారంగా తదుపరి చర్యలను చేపట్టనుంది